Minahasa Raya Net
Posted by KekeTanawangko on 1/4/2008, 6:53 am, in reply to "Re: Mandi Ujang di Taong Baru"
Doe pe grap ley da dengar Bur deng Rob pe cirita taong baru.
Kita rupa biasa malam 31 Des jam 09.30 malang so pi greja sampe lewat jam 12 baru kaluar. Sebelum jam 12 so klar khotbah, kong basombayang mo Perjamuan Kudus, jadi pas jam 12 sementara basombayang. Karena tu greja nyanda jaoh dari Monas jadi dapa dengar itu segala petasan deng kembang api dorang ada pasang di sana, juga di jalan depan greja itu kendaraan-kendaraan rame skali. Bae jo der masih bisa konsentrasi da basombayang hehehe....Jadi pe amin so taong baru karu e.....och mate....
Kong lantaran da ujang, jadi nyanda kamana-mana lagi, pulang trus bakumpul deng sudara-sudara, makang minung bacirita tagate tau-tau so pagi....baru tidor...kong bangong jam 11, sama deng Rob, mar nyanda ba slaber komang. Banya tamu datang sampe malang, akhirnya tidor lat padahal besoknya so musti ka kantor lagi.
Besoknya, sementara buka MRN, dorang dari Manado telpon, dorang bilang hi....so maso karja? Napa torang masih ka greja, taon baru (hari) ka-2....Trus dapa inga waktu kacili, ajus kalu bli akang baju Natal deng taong baru nyanda cukup 1 atau 2 lantaran vor ka greja hari pertama dan ka-2.
Laeng lagi dari Tanawangko telpon, napa dorang sementara pasiar-pasiar, ada cakalele....ada figura di jalan-jalan...en tantu makang-makang. Ah....trus ta inga waktu kacili, hari-hari basar bagini suka skali pasiar-pasiar. Dari rumah oma di Tanawangko babaputar nae oto lewat Lemoh sampe Ranotongkor kadang sampe Tomohon trus ka Senduk, Mokupa sampe Tikala Baru, Manado.
Tiap maso rumah ambe kukis, kase maso popoji, akhirnya itu popoji punung deng kukis kong serta sampe rumah so ancor samua.... Kong itu biji-biji kurang ja baku lempar akang...adoe...
Hari ini dorang dari Tanawangko so gara akang, nanti hari Minggu, Kuncikan. Nyanda mo pulang? Adoe memang pe rame skali katuun itu hari kuncikan bagitu. Memang kwa....pagi kal pagi, ancor kal ancor....mar kita komang nyanda mabo kal mabo rupa Oom Endi....hahahaha....
Message Thread:
« Back to thread