Minahasa Raya Net
Posted by BARABAS on 1/2/2008, 12:03 pm
Biar ujang keras da teru maar Taong baru lia pe rame skali apalei tu orang batona deng satu payung dorang dua baku plo bajalang gaya lambat sebab da ujang kata.
Kitya deng tamang tamang so buka baju alias bugil so telanjang bulat putih popolulu,
tu baju baru da taru akang di bawah kolong rumah,... deng rekeng satu dua tiga ,.byuuuurrr ,..torang lari diujang mandi balumpa babanting iko kuat bermaeng aer baku sirang sampe torang pe burung kacili so fororo lia sama deng kukis biji biji.
Waktu Dulu torang tole deng keke kanino bulung rasa nintau malo biar le da mandi telanjang torang nda vastiu nda rupa skarang.
Ujang turung ta curah pe keras skali lia tu aer punung so banya skali sampe nda dapa lia jalang.
Beking kapal kacili dari kertas lalu torang kase anyor baku taru sapa yang lebe cepat.
Baku dusu plo ba guling di aer deng blek mantega torang baku sirang balari baku iko.
Oom Buang pok pok tanta Fien pe tona da gale lubang mo beking parigi,tagal tu lubang so punung deng aer torang nintau da baku dusu bagini deng tiga kanino tamaso di dolong lubang sampe ta minung aer pece kokehe jaha amper lida mo kaluar,
Dengar kamari ,...Mampoooos lebe bae ngoni eh,...oom Buang bataria iko kuat,da hati saki stouw dia tagal da dapa sirang deng aer kincing tu hari,..sapa suru mo jadi pok pok ngana oom Buang.
Ambe opa Kaunang pe tali timba torang kanino baku hela kaluar dari lubang setang putyar ityu deng dolong hati,..pe moskon dengana oom Buang,... deng,...baku dusu ulang sampe dingin so totofore baru brenti.
Abis itu torang timba aer di spoel badang deng aer parigi lalu mata ba lia orang pe handdoek rado kamari torang goso badang kase kring baku ganti sampe lia tu handdoek so sama deng trapu.
Ujang masih turung,oma Sien beking teh gula deng apang lalu dia kase patorang ,wow kaninos pe dunya sudah tu babagini karu eh.
Dudu di kadera rotang ba kutu busu torang menyanyi balumpa sampe suara faro.
Menyanyi ulang Goyang sage ta goyang sage sampe kadera rotang ta goyang goyang ,kita dudu bagoyang badang lei ,..
da sementara bagoyang badang deng kita bataria riki mo mati ,.. nda tahang kitya tagal musibah mendadak yang terjadi ini depe saki luar binasa ukur tobat punya,..kenapa ??
maklumlah waktu ityu deng celana papo,
tagal tadi da dudu bagoyang riki kamari tu rotang penyaki ityu dia gepe kita pe kanikir kacili,...uuhhhh
depe rasa ngilu rasa rasa mo mata tinggi kitya,..
dengar kamari lei oma Sien so tatawa iko rame polote picia picia,
Kita pulang dirumah bajalang tabuka tabuka sama deng boke da baru abis kabiri.
Burako.
Message Thread:
« Back to thread