Minahasa Raya Net
Posted by BURAKO on 12/9/2007, 10:42 am
Oma da beking lalampa.
Kita musti potong tu daong pisang iko ukuran yang oma da kaseh abis itu tu daong musti kase panas akang di api supaya jadi lombo.
Depe bumbu kita masih inga yaitu;
Ikang Cakalang,daong kemangi,daong kucai,pandan,sereh
bawang putih,bawang merah,goraka,deng rica juga garam secukupnya.
Tu beras ketan oma kukus deng santen,abis itu kita lia oma beking nasi bungkus,pokoknya dalang rumah so sama deng restoran,gurih masakan tercium dimana mana,malumlah eso somo Natal kata.
Abis bakar nasi jaha opa so sibuk deng pangi isi di bulu nintau ada brapa bulu lia pe banya skali maar dia da kase tanda yang mana pangi dan yang mana daging babi,..ohoho howw torang mulai bakar ulang ta pe suka suka ni dia bermaeng api.
Taong lalu kita da kincing di api bara tampurung depe eso lia tu burung so sama deng pimpong peot beking kita so tobat nda mo kincing di api lei.
Kiri kanan samua sibuk deng momasa,beking kukis deng apa saja,sperak lantaka babunyi beking rame lei,kapala jaga deng kuntua so balenggang deng calana papo nintau mo kamana.
Bakar pangi
Deng mafafa Ramang bakar iko kuat, tu bulu kacili Ramang punya da isi daging akang so mandidi depe aer so kaluar dari bulu pertanda so masa mo cia jo,nda tahang lei kita bla akang tu bulu lalu cura di daong pisang cuci tangang lalu wako jo kasitu rasa pe sedap deng pidis sekali.
Mada juga da mo kalah biar dapidis maaer dia iko makang.
Abis makang torang lia opa da rekeng tu bulu lalu dia ator akang dipinggir dodika.
Nintau mo beking apa lei makang sampe pusa so lari sei nda pake cincong banya kita ambe tu macis deng ciissss,... api kacili menyala , Mada da bale lakang ,babadiang deng kita sorong tu api di Mada pe rok ,oho ho ho rok tabakar Mada lari menangis jaha.
Memang indah kalu ta inga akang yang dulu dulu apalei deng so dekat Natal bagini kita ta inga tu kukis deng makanan pe sedap sedap rupa ini ,
- Ayam bumbu RW-
- Ayam Ganemo (Daeng Pantera)
- Ayam rica rica
- Ayam woku belanga
- Babi bakar dibulu
- Bruinebonen soep
- Cakalang fufu,ikang roa
- Garo bunga pepaya,kangkong cah
- Acar,rebung,sayur paku,
- Sayur nangka santen pake ikang garang
- Ikan bakar dabu dabu
- Ikan rica-rica (mujair)
- Klappertaart
- Nasi jaha & ayam tuturuga
- Panada
- Tinotuan
- Lalampa
- Biapong,cucur,
- Apang,biji biji
deng ada banya lei so lupa kitya.
Burako.
Message Thread:
« Back to thread