[ Cevap | Dersim Forum ]
Posted by ibrahim dogan (akt.) on 29/10/2009, 1:32:21
Message modified by board administrator 29/10/2009, 11:49:08
HERİ SERA „YAŞASIN HALKIN KURTULUŞU“ NIVISNA Bİ
Waxtê des o dıdê Eylulio (12 Eylül). Her het ra dewrimci, demoqrati, welatheskerdoği kuli ebe dipçige cenderma ver suka ra, dewa ra hetan şüanê serê koa kuli kerdi top. Eşti hepısa, işkenca de kerdi seqet.
Tam a waxto germın de Varto de naiya ma Uskura de (Çaylar) Sılêmanê Usê Kare naiya ma de zaf piyaê de rınd bi, leqçi bi, kêfli bi. Zaifiya jü isani ke bıdiyêne, kewtêne ra cı, tey leq u luqi kerdêne..Taê isani tersanê Sılêmani ra neşiyêne Uskura. A are de rojê çê xo boyax - badana keno. Dewe de kes nêmendo, tey leqi bıkero. Tam a waxt verê çêverê dê ra herê Çê İbraimê Dawudi derbaz beno. Sılêman çapık fırçê xo nano ro, kuno ra heri dıma, heri pê cêno, ano erzeno zere. Heri sera ecele ebe boyaxê xuyo rengın sera „YAŞASIN HALKIN KURTULUŞU“ heto bin ra ji nıvısno, heri raya qereqoli ra keno raşt. Her hero nerio, muso heranê dewa mankera (heranê maykeka), şono leê dina. Waxto ke kuno verê qereqoli, beno zırre-zırra heri, nınga dano we. A waxt nobetçi cendermi qayt kenê, heri sera „Yaşasın Halkın Kurtuluşu“ nıvısiyao. Nobetçi cenderme xebere dano qumandani, vano „itha ra herê vêrd ra, heri sera ‚Yaşasın Halkın Kurtuluşu’ nıvısno.“ Qumandan emır dano, vano, „çapık heri pê bıjêrê!“ 2-3 cendermi teba çhek o silaanê xo kunê ra her dıma. Her cenderma vineno, remeno, verê dukana ra, verê qewa ra çarnıng derbaz beno. Aca mıleto ke verê qewa de ronişto, yaziyê heri wanenê, tasêle benê, xo hard ra gıleri kenê. Cenderma ki heri dıma vinenê, daha zêde hunê. Cendermi nêresenê heri. Cêra rae ra kam êno, veng danê, vanê „heri pê bıjêrê“. Neyse, verê koperatifi de heri pê cênê, erzenê dipçiga ver, anê qeroqol. Heri cênê sorği, kes wayir nêvecino. Her waxtê maneno.. Baxçe de gırê do, cı rê vaş benê, vanê,
„Wayirê heri kamo, bêro.“ Bıraê İbrahimi Dawud şono, vano,
„Qomutan, no herê mao“ Dawudi ra pers kenê, vanê,
„No yazi kami nıvısna?“.Dawud sond weno, vano,
„Ma cı ra bêşıkime, xebera ma çina.“ Bado tiner danê ardene, ebe tiner yaziyê serê heri cendermi ebe destanê xo sil kenê, heri kunê, baxçê qereqoli ra erzenê tever… Her rêna zırreno, ebe çarnala raya dewa teze cêno..
Mesela herê Xal İbraimi o qereqoli nia derbaz bena.
Nıvısnoğ: dewa Muska ra tornê Mamudê Zeke, İbrahim Doğan (Varto)
80
Responses: